Një ngjarje e rëndë u shënua pasditen e djeshme në Gjoricë të Poshtme në Bulqizë, ku një vajzë 7-vjeçe u mor nga rrjedha e lumit Drini i Zi dhe u mbyt. Menjëherë pas njoftimit, nisën kërkimet për gjetjen e të miturës, ku u angazhuan familjarë, banorë të zonës dhe shërbimet e policisë. Trupi i pajetë i vogëlushes është gjetur paraditen e sotme pranë urës së Drinit.
Sipas raportimeve, pesë të afërm, xhaxhai me dy nipërit dhe dy mbesat kishin hyrë për t’u larë ku i ka marrë rrjedha e lumit. Xhaxhai me dy nipërit dhe një nga vajzat arritën që të shpëtoheshin, ndërsa 7-vjeçarja jo. Sipas informacioneve paraprake, dyshohet se rritja e prurjeve të lumit Drini i Zi ka ardhur nga hapja e portave të hidrocentralit të Shpiljes në Maqedoninë e Veriut.
