Përplasjet në Zvërnec kanë shkaktuar edhe reagimin e qeverisë greke. Në një deklaratë zyrtare të ministrisë së jashtme të Greqisë thuhet se një shtetas grek u plagos rëndë në incidentet që ndodhën të shtunën, gjatë një proteste të banorëve kundër ndërtimit të një resorti turistik në një zonë të ndjeshme ekologjike.
Ministria e Jashtme greke thotë se ka protestuar pranë qeverisë së Tiranës, duke kërkuar sqarim të rastit dhe llogaridhënie. Athina shpreh njëkohësisht shqetësimin e saj të fortë për incidentet dhe kujtoi se pajtueshmëria me acquis evropiane është një parakusht për procesin e pranimit të Shqipërisë.
“Ministria e Punëve të Jashtme shpreh shqetësimin e saj të fortë për incidentet që ndodhën dje, më 30 maj 2026, në Zvërnec, Shqipëri, gjatë një proteste nga banorët për të drejtat e tyre të pronës, përfshirë një shtetas grek i cili u plagos. Ambasada e Greqisë në Tiranë ndërmori menjëherë të gjitha veprimet e nevojshme për t'i ofruar atij të gjithë ndihmën e nevojshme konsullore dhe mjekësore.
Ambasada e Greqisë në Tiranë po bën gjithashtu paraqitjet e nevojshme ndaj palës shqiptare, duke kërkuar një sqarim të plotë të incidentit dhe atribuimin e përgjegjësisë. Ne shënojmë në këtë kontekst përgjigjen e parë të Autoriteteve Shqiptare.
Ne nënvizojmë nevojën për respektim të plotë të sundimit të ligjit, duke përfshirë mbrojtjen e të drejtave dhe pronës së anëtarëve të Minoritetit Kombëtar Grek, si dhe rëndësinë e mbrojtjes efektive të zonave të mbrojtura mjedisore, në kontekstin e përafrimit me acquis evropiane, përputhshmëria me të cilën është një parakusht për përparimin në procesin e pranimit” – thuhet në deklaratën e ministrisë së Jashtme të Greqisë.
Mediat më të mëdha në vendin fqinj si “Kathimerini” dhe “Protothema” i kanë kushtuar vëmendje të veçantë rastit. “Protestuesit theksojnë nevojën për të mbrojtur mjedisin natyror dhe kundërshtojnë planet e ndërtimit në një nga zonat më të ndjeshme ekologjikisht të bregdetit shqiptar, pasi biodiversiteti i Pishë Poro - Nartës është i kërcënuar dhe bëjnë thirrje për ndërprerjen e menjëhershme të projekteve dhe që projekti të rishqyrtohet” – shkruan Protothema.
Sipas gazetës greke, zhvillimi i projektit thuhet se i është besuar kompanisë “Zvërnec South Adriatic Development”, e cila është e lidhur me struktura ndërkombëtare investimi që përfshijnë Jared Kushner, Ivanka Trump dhe biznesmenë nga Katari. ©LAPSI.al
