Protesta kundër qeverisë hyn sot në ditën e 89-të. Qytetarët pritet të rikthehen në shesh, ndërsa pas arrestimit të Ergys Agasit, thirrjet drejtuar SPAK-ut kanë zënë një vend gjithnjë e më të madh në tubim. Një mbrëmje më parë, protestuesit e cilësuan arrestimin e Agasit si “majën e ajsbergut”. Nga podiumi u kërkua vijimi i hetimeve, konfiskimi i pasurive të paligjshme dhe hetimi i zyrtarëve të tjerë të lartë. Mes emrave të përmendur nga protestuesit ishin kryeministri Edi Rama dhe Belinda Balluku.
Protesta e sotme pritet të rikthejë në qendër edhe kërkesat politike të artikuluara prej gati tre muajsh. Qytetarët kërkojnë dorëheqjen e kryeministrit Edi Rama, largimin e qeverisë dhe krijimin e një qeverie teknike tranzitore me mandat 12-mujor. Sipas protestuesve, qeveria tranzitore duhet t’i hapë rrugë një procesi të ri politik dhe krijimit të kushteve për zgjedhje të lira dhe të ndershme.
