Vrasja brutale e një vajze 15-vjeçare dhe dy 20-vjeçarëve nga trafikantët e drogës, të cilët fillimisht i torturuan, pastaj i përdhunuan dhe në fund i vranë, ka tronditur Argjentinën. Sipas mediave vendase, tortura dhe fundi tragjik i tre vajzave të reja u transmetua LIVE në një grup të mbyllur në Instagram që u ndoq nga rreth 45 persona.
Burime policore raportuan se autorët i prenë gishtat 15-vjeçares Lara Gutierrez, vranë 20-vjeçaren Morena Verdi duke i vënë një qese në kokë për t'i shkaktuar mbytje ndërsa Brenda Del Castillo, gjithashtu 20 vjeç, u gjet e vdekur me kafkën e thyer dhe barkun e hapur.
Mediat lokale raportuan se motivi i krimit brutal ishte akuza kundër tre vajzave se kishin vjedhur 4 kilogramë kokainë. Kurthi, sipas të njëjtave burime, ishte ngritur me joshjen e pjesëmarrjes në një festë dashurie për të cilën secila vajzë do të merrte rreth 300 euro si shpërblim.
Një shtetas peruan, i cili besohet se është larguar nga Argjentina është identifikuar si kreu i bandës që dyshohet se urdhëroi "vrasjet për hakmarrje" si një "masë parandaluese" për të tjerët.
Herën e fundit që tre viktimat u panë gjallë ishte nata e së premtes së kaluar, kur siç njoftoi një zëdhënës i policisë, "ato u panë duke hyrë në një automjet vullnetarisht, sepse ishin ftuar në një aktivitet, pa e ditur se po binin në një kurth të ngritur nga një bandë ndërkombëtare e trafikut të drogës, e cila kishte kurdisur një plan për t'i vrarë”.
Deri më tani janë bërë 4 arrestime, ndërsa automjeti në të cilin udhëtonin vajzat u gjet i djegur 100 metra larg shtëpisë ku u gjetën trupat e tyre. ©LAPSI.al
