Duhet një shkundje, një shkëndijë, për të ringjallur Juventus, që pas daljes nga loja për titullin duhet të gjejë stimuj të rinj për të përfunduar një sezon pozitiv të deritanishëm dhe që i sheh në garë të plotë për të fituar Kupën e Italisë. Fillimisht Udinese dhe më pas Verona treguan një skuadër që duket se është dorëzuar papritur, pa cinizëm dhe dëshirë për të fituar. Në këtë pikë e vetmja lëvizje që mund të ndryshojë marshin në sezon mund të bëhet nga Max Allegri. Si? Duke ndryshuar modulin e lojës dhe duke i përzier disi letrat si pëlqen ai me Yildiz, Vlahovic e Chiesa në fushë njëkohësisht.
ME TRE SULMUES
Ideja është ajo që të zbresë në fushë jo më me 3-5-2 e kolauduar, por duke vendosur një tridhëmbësh ofensiv. Duhet shfrytëzuar potenciali i Vlahovic, Chiesa dhe Yildiz, duke i bërë ata të luajnë së bashku. Ai që mund të përfitonte mbi të gjithë është Federico, i cili deri tani është shfaqur më i shuari nga të tre, padyshim nën potencialin e tij. Diçka u pa tashmë në “Bentegodi” të shtunën e kaluar, kur Chiesa u vendos majtas dhe Yildiz në të djathtë. Duket se në Continassa po punohet për një 3-4-3 ose një 3-4-2-1 për ndeshjen e së dielës në Allianz Stadium kundër Frosinones të ish-ëve Sulé, Kaio Jorge dhe Barrenechea.
Tridhëmbëshi mund të jetë arma e duhur, si për të rikthyer motivimin në grup, ashtu edhe për të gjetur sërish fitoren, duke qenë se Juventus nuk ka marrë tre pikë prej një muaji. Pak si ajo që ndodhi në vitin 2017, kur Allegri shpiku një 4-2-3-1 me Mandzukic, Dybala, Cuadrado dhe Higuain në fushë në të njëjtën kohë. Lëvizje që i çoi bardhezinjtë në finalen e Champions kundër Real Madrid.
Lexo më tej: Fjalimi i teknikut Allegri për skuadrën e Juventus: "Titulli ishte një ëndërr, të mbrojmë vendin e dytë"
NDRYSHIM EDHE NË MBROJTJE
Vështirë, ndërkohë, që reshtimi difensiv të mund të ndryshohet. Pika kryesore mbetet Bremer dhe braziliani performon më së miri vetëm duke luajtur me dy shokë skuadre në anët. Realisht, në seancën e sotme stërvitore, e hapur për tifozët dhe e ndjekur nga Scanavino, Giuntoli dhe Manna, Allegri rreshtoi të dyja skuadrat me linjën me katër në ndeshjen e fundit stërvitore që përfundoi me golat e Vlahovic dhe Chiesa. Një shenjë se ndoshta diçka mund të ndryshojë edhe në atë repart. Ndërkohë në ndeshjen tjetër do të mungojë Danilo për shkak të dëmtimit dhe vendin e tij do ta marrë Alex Sandro apo Rugani. Megjithatë, ka mundësi që Tiago Djalò të mund të përdoret për disa minuta, duke bërë kështu debutimin e tij zyrtar me fanellën bardhezi.
