“Nuk jam marrë asnjëherë me arbitrat dhe nuk do merrem. Kështu që nuk kam asnjë dyshim për rastin. Mendoj se çdo prekje me dorë në sulm është faull, të paktën këtë e di nga rregullorja. E lëmë pas. Nuk merrem me këtë". Julian Ahmataj nuk e kapërcen dot barazimin 2-2 me Teutën, pasi kishte kontrolluar ndeshjen për një orë lojë. Dy golat e Llocit në dy minuta e për më tepër i dyti i njollosur me një prekje me dorë e ka zemëruar teknikun e Tiranës: "Unë nuk diskutova pamjet. Nuk diskutova asgjë për rastin. Thashë që nuk do merrem me arbitrin. T’ia ulësh shokut me dorë, si nuk është prekje me dorë".
Sidoqoftë, Ahmataj i gjen gabimet te skuadra e tij: "Është një ndeshje që duhet ta kishim fituar. Duhet ta kishim menaxhuar më mirë ndeshjen. Presioni i rezultatit hyn te skuadra dhe kjo bën që mos ta menaxhosh mirë. Duhet të përmirësohemi në vazhdimësi, sepse kemi potencial dhe në fazën defensive".
Lexo më tej: Video/ Teuta rikuperon dy gola dhe bllokon Tiranën mes polemikave: Lloci shënon dygolësh, Doka përjashtohet
Tekniku bardheblu u ndal edhe te merkato, duke pranuar limitet e skuadrës me merkato të bllokuar. "Normal që çdo skuadre i duhen lojtarë. Çdo skuadër ka nevojë për përforcime. Por në këtë ndeshje na mungoi dhe Najdovski, që në këtë ndeshje do ishte deçiziv. Kështu që ishim të detyruar të merrnim lojtarë nga akademia. Ne nuk kemi thënë që s’e kemi problem largimin e Kainës apo Hasanit. Ne nuk i pengojmë lojtarët".
MARTINI: NDESHJA MË E KEQE NË 10 TË FUNDIT
“Duhet të them se është ndeshja më e keqe që kemi bërë në 10 ndeshjet e fundit. Në pjesën e parë lamë Tiranën të qarkullonte topin, nuk arritëm në asnjë moment ta vinim në presion dhe i dhamë superioritetin numerik e na morën mesin e fushës". Edi Martini, tekniku i Teutës, është një stuhi pas 2-2 me Tiranën, që në thelb është një rezultat i rëndësishëm. "E vërtetë që ishte pikë si fitore, se në këto kushte është e rëndësishme ana psikologjike se një humbje do të na sillte ulje morali. Është pikë karakteri, si fitore se ndeshje të tjera na presin dhe duhet çojmë ritmin e lojës patjetër".
