Egnatia shkatërron 1-4 Kukësin në Kukës Arena, duke e bërë teknikun Stavri Nica të pendohet që u kthye në pankinë, pasi dha dorëheqjen. Asgjë për të bërë kundër kryesuesve të kampionatit, që e zgjidhën ndeshjen që në pjesën e parë me lehtësinë më të madhe. Malota, Fernando e Gjata vunë në kasafortë rezultatin, ndërsa shpresat e vakta nga goli i Rashitit u mbytën nga goli në debutim i kostarikanit Montenegro.
U PREZANTUA PARA NDESHJES, U ZËVENDËSUA PAS 37 MINUTASH
Nica futi në fushë edhe moldavin Nikolai Solodovnikov që e prezantoi vetëm 30 minuta para ndeshjes. Kukësi që u pa në fushë ishte ai më i dobëti dhe Nica vetë ishte në kaos duke e larguar moldavin nga fusha pas 37 minutash. Tetova zbriti në fushë me Ibrahimoglu e Gjatën, të ardhurit në janar, nga minuta e parë. Pankinë ndërkohë për sulmuesin nga Kosta Rika Jurguens Montenegro. Por në Kukës nuk ishte nevojë për peshat e rënda, sepse rrogozhinasit e zgjidhën shpejt.
Në minutën e 12′ pas një harkimi nga goditja e këndit, Malota përfitoi në zonë duke shënuar golin e avantazhit. Një goditje që e shastisi skuadrën e Nicës që në harkun e katër minutave mes të 30’ e 34’ pësoi edhe dy të tjerë. Fernando shënoi nga pika e bardhë e penalties, ndërsa Gjata shfrytëzoi asistin perfekt të Ndrecës.
[video width="636" height="360" mp4="https://cdnimpuls.com/lapsi.al/wp-content/uploads/2024/01/Gjata.mp4"][/video]
MONTENEGRO, GOL NË DEBUTIM
Në pjesën e dytë, Egnatia administroi pa dashur ta zgjerojë rezultatin. Kukësi vuajti shumë për të krijuar e megjithatë 10 minuta nga fundi pa një shpresë të vakët, kur Rashiti shfrytëzoi një gabim të rrogozhinasve dhe ngushtoi rezultatin. Një motivim që kuksianët e patën vetëm 9 minuta, sepse Montenegro, i futur në fushë në minutën e 71’, vulosi pokerin. Goli i parë në ndeshjen e parë me Egnatian për kostarikanin Montenegro, që është gati të marrë hapësirën e tij. Egnatia ngjitet në 43 pikë dhe vë në sprovë Partizanin që e ndjek, ndërsa Kukësi rrezikon të zbresë i fundit nëse Teuta fiton me Tiranën.
[video width="636" height="360" mp4="https://cdnimpuls.com/lapsi.al/wp-content/uploads/2024/01/MONTE.mp4"][/video]
