“I mërzitur se po hyjmë në një krizë që faktikisht nuk e meritojmë si ekip. Riformatimi i skuadrës është i vonuara. Një skuadër e formatuar për 2-3 tre ditë apo lojtarë që direkt nga avioni zbresin në fushë, nuk mund të presësh më shumë". Stavri Nica pa Kukësin e tij të shkatërrohej 4-1 nga Egnatia, pak ditë pasi hoqi dorë nga vendimi për tu dorëhequr. Tekniku ka parë skuadrën të shthuret, por nuk heq dorë, i bindur se gjërat do të ndryshojnë: "Meqë u kemi dhënë fjalën çunave duhet durim punë, asgjë nuk ka mbaruar".
Nica pastaj ka mbuluar edhe prezantimin skandaloz të moldavit Nicolai Solodovnicov. Lojtari u prezantua vetëm pak para ndeshjes, u rreshtua titullar dhe u zëvendësua pas 37 minutash nga tekniku: "Mendjen e kam vrarë shumë, por zgjidhje tjetër nuk kishim. Edhe unë duhet të kisha krijuar një farë ekuilibri si funksionon kundërshtari, edhe përgjegjësia është e imja”.
Lexo më tej: Video/ Nica pendohet që u kthye: Egnatia e shpartallon keq 1-4, debuton me gol Montenegro
TETOVA, 4-1 E SËRISH I PAKËNAQUR
“Siç kishte gjëra të mira, kishte dhe probleme. Lëshuam pak terren, gjë që nuk më pëlqeu. Por me ndryshimet që kemi, janë të pranueshme”. Një koment i shpejtë i teknikut Edlir Tetova pas fitores së thellë 4-1, por që siç duket nuk e ka kënaqur plotësisht. Kreu i pankinës rrogozhinase nuk e ka suportuar dot tërheqjen e ekipit dhe përballjet e humbura në një kundër një. “Për 15 minutat e fundit e fundit nuk u mora fare me tre golat. Nëse një ekip do të jetë në krye duhet të kemi më shumë uri”.
Rikthimi i Malotës dhe Aleksit pastaj duket se ka kthyer stabilitetin në lojën e Egnatias. Në këtë pikë nuk munguan elozhet e Tetovës: “Ata janë lojtarë të rëndësishëm të ekipit. Rrugëdaljet nisin nga poshtë. Lojtarët që ishin në ndeshjen me Skënderbeun, jo që bënë keq, por lëvizja e topit nuk ishte e duhura dhe krijuan trazira”.
