Dy lojtarë të skuadrës së Inter janë paditur nga një i ri, pas një sherri të dyshuar të ndodhur mbrëmjen e 6 janarit në diskotekën e njohur Hollywood. Ngjarja u raportua nga Corriere della Sera.
Sipas asaj që raportohet nga Corriere della Sera, gjatë festës private në Hollywood, ku morën pjesë disa lojtarë të Serie A, dy lojtarët e zikaltërve detyruan një djalë nga Friuli të largohej nga lokali. Arsyeja? Sipas tyre, i riu i kishte bërë foto dhe video të dyve në momente private.
ÇFARË NDODHI NË HOLLYWOOD?
Sipas rikonstruksionit, paditësi ka deklaruar se në orën 4.15 të mëngjesit i është afruar një burrë i gjatë, biond, i cili e ka pyetur nëse i kishte filmuar miqtë e tij lojtarë të Inter. Pyetjes së tij ai iu përgjigj negativisht. Pavarësisht kësaj, djali më pas u nxorr me forcë nga klubi. Siç raporton për Corriere avokati i tij Stefano Tutino, "duke e gjetur veten në vështirësi të qarta, edhe numerike, klienti ynë nuk ka rezistuar dhe ka vuajtur situatën e sikletshme. I vizionuan fotot e tij personale dhe gjithashtu profilet e tij sociale dhe nuk kanë gjetur asgjë".
Lexo më tej: Futbollistët, klubi e tifozët: Inter nga ‘lepur’ në ‘iriq’ kundër sulmeve
Avokati foli edhe për një kërcënim të pretenduar: “E di se çfarë mund të të ndodhë nëse vihesh kundër meje”, i ka thënë njëri nga dy lojtarët. “Nëse do të vërtetoheshin faktet – shpjegoi Tutino – të dy rrezikojnë të hetohen për kërcënime dhe ushtrim arbitrar të të drejtave të tyre. Kjo pasi kanë vepruar me dhunë dhe kanë cënuar privatësinë e klientit tonë”. Ndërkohë, viktimës së dyshuar iu sekuestrua celulari për gjurmë gishtash, si dhe u siguruan edhe regjistrime nga kamerat e lokalit.
Natyrisht, për momentin, nuk bëhen të ditur emrat e asnjë prej dy lojtarëve zikaltër të përfshirë.
