Vinicius provokoi me gjestin e ‘4-1’ me duar: pankina e Barcelonës tërbohet me brazilianin

Vinicius Jr ishte një protagonist i madh i Superkupës së Spanjës, të cilën Real Madrid e fitoi triumfalisht, 4-1 ndaj Barcelonës. Sulmuesi brazilian shënoi tregolësh në pjesën e parë dhe çmendi mbrojtjen kundërshtare. Vini Jr sidoqoftë bëri zhurmë edhe për një gjest provokues ndaj pankinës së katalanasve. Në minutën e 71’ Ronald Araujo shkaktoi një faull ndaj anësorit brazilian që i kushtoi kartonin e dytë të verdhë dhe, rrjedhimisht, përjashtimin. Vinicius u ngrit në këmbë dhe festoi plot adrenalinë, disi edhe jashtë vijës, si në realitet kishte bërë edhe më parë në këtë ndeshje. Mes të qeshurave dhe festimeve të brazilianit, erdhi edhe reagimi i pankinës së Barçës, të cilët nuk e pëlqyen sjelljen e tij. Pas një shkëmbimi të shkurtër fjalësh, Vinicius Jr bëri gjestin e 4-1 me duar, duke u kujtuar lojtarëve të Barçës rezultatin. Kjo e rriti edhe më shumë zemërimin dhe e bëri të hidhej përpjetë e gjithë pankina. Pankina e delegacionit Culé nuk e vlerësoi këtë sjellje të kundërshtarit dhe reaguan. Arbitri duhej të rivendoste qetësinë përpara se të rifillonte ndeshjen.

MEA CULPA E VINICIUS

Në një El Clasico janë të shumtë tensionet dhe Vinicius ishte në gjendje të acaronte edhe më tej nivelin e konfliktit me rezultatin tashmë të sigurt.

? ¡Dudo que haya un tipo más feliz en estos momentos!@vinijr | #SUPERCAMPEONES pic.twitter.com/EeL14kMNEf

— Real Madrid C.F. (@realmadrid) January 14, 2024

Në konferencën për shtyp pas ndeshjes, pasi mori çmimin MVP të ndeshjes, Vinicius sqaroi këto situata: "Dua të bëhem një person më i mirë. Bëj gjithçka për të fituar e përfundoj duke i zemëruar lojtarët. Të tjerët, veten dhe shokët e mi. Duhet të përmirësohem, por duhet të vazhdoj në këtë linjë. Jam shumë i trishtuar. Të gjithë duan të debatojnë me mua sepse të gjithë e dinë që do të shfaqet në shtyp 'Vinicius bëri këtë apo atë...' Mundohem të jem i qetë dhe i përqendruar në lojë për të dhënë më të mirën për shokët e mi. Unë nuk jam një shenjtor. Flas shumë dhe bëj driblime që nuk duhet. Por unë jam këtu për t'u përmirësuar dhe për të qenë shembull për fëmijët. Trajneri dhe shokët e mi po më mësojnë se çfarë duhet të bëj".