Të bashkuar në renditje para ndeshjes, e po njësoj edhe pas saj. Laçi dhe Erzeni kanë barazuar 0-0 në sfidën e javës së 19 të Superiores. Një barazim që nuk ndihmon askënd, por duke parë transfertën e kundërshtarit direkt, shijakasit duhet të jenë të kënaqur. Sidoqoftë, rezerva për arbitrimin kanë patur vendasit që iu anulua goli në pjesën e parë dhe luajtën me 10 lojtarë në pjesën e dytë. Mundësi që të besuarit e Deliallisit nuk e shfrytëzuan.
GOLI I ANULUAR
Të dyja skuadrat e nisën mirë dhe me raste takimin. Josa kishte të njëjtin grup, pa asnjë lëvizje në merkato, ndërsa Deliallisi duhet të bënte llogaritë me një revolucion të vërtetë. Tetë të larguar dhe, pas zhbllokimit të merkatos, nisën ardhjet, të gjithë me përjashtim të Komolafe në pankinë. Pikërisht sulmuesi ishte më impenjativi për Dajsinanin, duke testuar disa herë portierin. Laçi në anën tjetër e zgjidhi ndeshjen në minutën e 23' të pjesës së parë, kur Myrta shënoi në portën e Pujës. VAR dërhyri duke i prishur festën kurbinasve për një pozicion jashtë loje.
NË INFERIORITET
Në pjesën e dytë rastet ishin më të pakta, me skuadrat që nisin të rhuheshin nga gabimet e mundshme. Një lojë që i shkonte për shtat Erzenit, por jo Laçit. E megjithatë gjërat u komplikuan sepse Josa mbeti me 10 lojtarë. Da Silva u ndëshkua dy herë me të verdhë në katër minuta dhe në minutën e 59’ i la kurbinasit në inferioritet numerik. Favor që Erzeni nuk e shfrytëzoi, madje nuk rrezikoi asnjëherë portën kundërshtare, duke treguar dukshëm kënaqësinë për pikën në këtë transfertë.
Lexo më tej: Tre klube me merkato të bllokuar: Tirana, Skënderbeu e Erzeni duhet të paguajnë, të tjerët 'spastrojnë' radhët
Laçi e Erzeni ngjiten në kuotën e 22 pikëve, duke u bashkuar me Dinamon e Skënderbeun. Josa e sheh veten në vendin e gjashtë dhe Erzeni në vendin e tetë, por të dy ekipet janë njësoj të rrezikuar dhe në garë të fortë për mbijetesë.
