Trajneri i Paris Saint Germain, Christophe Galtier, është ndaluar nga policia për "dyshime të diskriminimit racor dhe fetar". Sipas agjencisë France Press, Galtier është në paraburgim në Nice së bashku me djalin e tij. Në mes të prillit, një hetim paraprak u hap kundër teknikut francez. E gjitha mbi dyshimet për "diskriminim të bazuar në një racë ose përkatësi të supozuar fetare". Bëhet fjalë për kohën kur tekniku 56-vjeçar ishte në pankinën e Nice, në sezonin 2021-22.
Ndalimi u konfirmua nga prokurori i Nice, Xavier Bonhomme: "Galtier dhe djali i tij janë në paraburgim në policinë gjyqësore të Nices që nga ora 8.45 e së premtes".
PËR ÇFARË AKUZOHET GALTIER
Gjithçka filloi me një email të bërë publik nga Rmc Sport. Ishte një mail i shkruar nga drejtori i përgjithshëm i klubit francez, Julien Fournier. Përmbajtja ishte e destinuar për drejtuesit e Nice: "Ai erdhi në zyrën time dhe më tha se duhej të merrja parasysh realitetin e qytetit - lexohet aty -. Më tha se nuk duhej të kishim kaq shumë lojtarë me ngjyrë dhe myslimanë në ekip. Ai më tha se kishte shkuar në restorant dhe se shumë i kishin vënë në dukje se Nice është "një ekip të zinjsh".
Lexo më tej: Christophe Galtier akuzohet për racizëm nga ish-drejtori sportiv i Nice: "Shumë të zinj e muslimanë në ekip"
Është vërtet një moment i keq për Galtier, i cili nga java e ardhshme nuk do të jetë më zyrtarisht trajner i PSG-së. Në vend të tij do të akomodohet Luis Enrique. Galtier u përfol edhe për pankinën e Napolit, por më pas u parakalua nga bashkëkombasi i tij Rudi Garcia.
