Barcelona, megjithë vështirësitë e njohura ekonomike, zgjidh "qesen" e hidhet e gjitha mbi Arda Guler. Xhevahiri turk i lindur në 2005, pëlqehet edhe nga Milan. Drejtori sportiv blaugrana, Deco, fluturoi sot drejt Turqisë për të gjetur një marrëveshje me Fenerbahce. Një tentativë e qartë për të mposhtur konkurrencën e kuqezinjve. Katalanasit duan të bllokojnë Guler dhe të marrin aprovimin e tij. Blerja përfundimtare mund të finalizohet verën e ardhshme kur arkat e kompanisë të jenë në kushte më të mira.
Barcelona, Milan, Real Madrid, Borussia Dortmund, Leipzig dhe Sevilla, lista e pretendentëve për Guler është e gjatë. Lojtari ka një klauzolë lirimi nga Fenerbahce prej 17.5 milionë eurosh. Sidoqoftë, atyre duhet t'i shtohet komisioni i pasur ndaj menaxherit, babait të tij, prej 20 milionë euro. Pikërisht ky fakt zbehu interesin e Milan dhe nxiti interesin e Deco.
Lexo më tej: Milan zgjedh talentin turk Guler: do të paguajnë më shumë se klauzola për të thyer konkurencën
Për ta përmbledhur, duke lënë mënjanë pagën, duhen 37.5 milionë për të siguruar një lojtar të ri shumë të talentuar. E megjithatë, bëhet fjalë për një bast, me lojtarin që shpërtheu në gjysmën e dytë të sezonit të kaluar. Në 34 paraqitje në kampionat, kupë të Turqisë dhe Ligën e Europës, Guler ka shënuar 6 gola dhe 7 asiste. Qershia mbi tortë ishte goli i tij i parë ndërkombëtar më 19 qershor kundër Uellsit.
