“Janë ditë pune të zakonshme, me problematikat e përditshme, të njerëzve që mundohen të ngrejnë nivelin e Partizanit. Mbas humbjes me Vllazninë, kërkonim që lojtarët të shpreheshin me karakterin që kanë dhe e treguan në fushë". Drejtori i përgjithshëm i Partizanit, Olsi Rama, foli pas triumfit 2-0 në derbi ndaj Tiranës. Një fitore që e ka cuar në eufori kampin e kuq, si duket nga deklaratat pompoze të drejtorit të kuq: "Titulli është një objektiv i vogël, ne punojmë për të rritur nivelin e ekipit. Duam të krijojmë një ekip që të fitojë në vazhdimësi. Në fund bëhen llogaritë. Në qoftë se vazhdojmë me këtë shpirt gare dhe këtë karakter në fund llogaritë do të dalin mirë".
Pas humbjes 3-1 në Shkodër dhe presionit të madh para derbit, ndoshta është e kuptueshme që Olsi Rama të lëshohet në ndonjë frazë të tepruar: "I pranojmë komplimentet gjithmonë, nuk na bëjnë shpesh. Është më lehtë të përgatisësh një derbi se një ndeshje me ekipet e vogla provinciale. Lojtarët kanë motivimin e duhur. Detyra jonë është t’i kujtojmë çdo të thotë të jesh profesionist çdo ditë dhe çdo natë".
Në fund edhe një konstatim për arbitrin Xhaja dhe asitentët e tij: "Unë mundohem të jem më koherent. Rezultati nuk është gjithmonë gjëja që më shumë më intereson. Dua të komplimentoj arbitrat, mbajtën një metër, u lejua lojë burrërore. Nuk do të ketë kontestime nga palët. Është një sukses për arbitrat. Duhet të jenë të padukshëm dhe të vendosnin drejtësi. Edhe arbitrat kanë nevojë për besim dhe duhen ndihmuar”, u shpreh Olsi Rama.
