Kupa e Shqipërisë 2022-2023 do të rikthehet këtë javë me ndeshjet e para të vlefshme për turin e 1/8-ave. Të martën do të luhen pesë ndeshjet e para, ku në fushë do të zbresin disa çifte interesante. Ekipet e Superiores do të luajnë të gjitha në transfertë, ndërsa beteja më e fortë do të jetë ajo në Ballsh. Vllaznia do të përplaset me Bylis, në të vetmin çift elitar, në këtë fazë të kompeticionit.
Lushnja-Tirana, Korabi-Partizani, Bylis-Vllaznia, Dinamo-Kastrioti dhe Tomori-Laçi do të zbresin në fushë të martën. Të gjitha ndeshjet do të startojnë në orën 13:00 të martën, me në fushë Grupin A dhe vetëm një sfidë të Grupit B. Ndërsa të mërkurën do të luhen sfidat Apolonia-Kukësi, Erzeni-Teuta dhe Skënderbeu-Egnatia, që nisin po në ora 13:00, me përjashtim të derbit durrsak.
Sakaq, ndeshjet e kthimit të këtij turi do të luhen më datën 2 shkurt. Sipas kalendarit të përcaktuar tashmë ndeshjet e para të turit të 1/4-at do të zhvillohen më 1 mars. Ndërsa ndeshjet e kthimit më 15 mars. Ndeshjet e turit gjysmëfinal do të luhen në datat 26 prill dhe 10 maj. Nuk ka ndryshim për finalen e madhe të Kupës së Shqipërisë. Akti i fundit për këtë edicion do të luhet më datën 1 qershor.
Kupa e Shqipërisë, Turi i 1/8
Ndeshja Data Ora Vendi
Lushnja-Tirana 17.01.2023 13:00 Lushnje
Korabi-Partizani 17.01.2023 13:00 Peshkopi
Bylis-Vllaznia 17.01.2023 13:00 Ballsh
Dinamo-Kastrioti 17.01.2023 13:00 Tiranë
Tomori-Laçi 17.01.2023 13:00 Berat
Apolonia-Kukësi 18.01.2023 13:00 Fier
Erzeni-Teuta 18.01.2023 16:00 Durrës
Skënderbeu-Egnatia 18.01.2023 13:00 Korçë
