Shtetet e Bashkuara të Amerikës njoftuan të dielën në mbrëmje se do të pakësojnë numrin e personelit në ambasadën e tyre në Kiev, duke nisur nga familjarët dhe anëtarët e stafit jo thelbësor. Të njëjtin vendim mori edhe Mbretëria e Bashkuar, që nisi tërheqjen e stafit nga ambasada në Ukrainë, ndërsa për momentin, zyrtarët e Bashkimit Europian kanë deklaruar se do të qëndrojnë aty.
Kjo është shenja më e fundit që paralajmëron përshkallëzimin e konfliktit në Ukrainë, pasi të gjithë aktorët tashmë besojnë se Rusia mund të nisë pushtimin e vendit fqinj në çdo moment.
Departamenti i Shtetit tha se vendimi është marrë pavarësisht se niveli i rrezikut për personelin e ambasadës nuk është rritur në ditët e fundmi. Por sërish, vendimi thekson frikën për pushtimin rus, të cilin vetë zyrtarë amerikanë e kanë cilësuar si të mundshëm. CNN raportoi të premten se kërkesa kishte ardhur nga vetë ambasada, për shkak se Rusia ka shtuar dhjetëra mijëra trupa në kufi me Ukrainën. Nga ana tjetër, BBC raporton se stafi në ambasadën britanike në Kiev do të përgjysmohet.
Sipas Ministrisë ukrainase të Mbrojtjes, trupat ruse në kufi janë 127 mijë, por Kievi zyrtar tha se vendimi për të larguar stafin është “i parakohshëm” dhe “i tepruar”. Ndërkaq, kryediplomati i Bashkimit Europian, Josep Borrell, tha se unioni nuk do ta “dramatizonte” më tej situatën duke tërhequr stafin. “Nuk do të marrim të njëjtin vendim, pasi nuk kemi arsye specifike për ta bërë këtë”, tha Borrell, para një takimi me ministrat e Jashtëm të BE-së.
