Ditën e zgjedhjeve për kryetarin e PD-së, tre ditë pas deklaratës bombë të Sali Berishës se nuk përjashton rikthimin në krye të partisë që drejtoi për mbi çerek shekulli, ish-kryeministri takoi Lulzim Bashën në zyrën e tij.
Takimi në selinë blu zgjati mbi dy orë. Asnjë detaj rreth diskutimit nuk ka rrjedhur në media.
E ndërsa deklarata e Berishës për rikthim tronditi partinë më të madhe të opozitës, të cilën Lapsi.al e përshkroi si një shantazh ndaj Lulzim Bashës, ky i fundit nuk duket se ka reflektuar për të ndryshuar qëndrim ndaj "non-gratas" që amerikanet i caktuan Berishës.
Analiza/ Arsyet pse Berisha po shantazhon Bashën dhe ç'mund të ndodhë në PD?
Në zgjedhjet e sotme favorit është Basha. Kur Berisha troket në derën e kryetarit që e caktoi vetë dhe kalon mbi 120 minuta aty, hamendësisht mund të themi se diçka eshte gatuar. Veshja e Berishës me mburojën blu? Apo ndarja përfundimtare e Bashës nga babai politik?
Ditën kur 75 mijë anëtarë të kësaj force politike po votojnë për të zgjedhur kreun e tyre, Berisha nuk u mbështet bindshëm nga asnjë pretendent, as nga Basha, Fatbardh Kadilli, Edith Harxhi, apo Agron Shehaj.
Cilido qoftë rezultati i zgjedhjeve të sotme, Sali Berisha nuk e ka luksin të brohorasë për asnjërin.
Analiza/ PD po hyn në epokën e post berishizmit
Në fasadë Berishës nuk i është treguar dera nga partia e tij, edhe pse ne thelb ai deri sot eci vetëm. Nuk dihet nëse takimi i gjatë me Bashën do ia ndryshojë fatin.
Megjithatë, nëse historinë do e përshtasim në ekuacion, drejtuesi më jetëgjatë politik i Shqipërisë post komuniste, edhe pse afër 80-ave, nuk do duhej të surprizonte askënd nëse do vendoste ti futej një rrugëtimi të fundit të udhëheqjes politike, në stilin agresiv që në zhargon i mban edhe emrin, stilin berishian.
Kjo do të ishte beteja e fundit e doktor Berishës, sa simbolike aq edhe konkrete. Por ndryshe nga ç'na mëson historia, e para betejë që nuk kërkoi vetë ta luftonte. ©Lapsi.al
