Gjykata Kushtetuese nisi sot shqyrtimin e Padisë së Presidentit të Republikës për shembjen e Teatrit Kombëtar. Presidenti Meta kërkon shfuqizimin e kalimit të pronësisë së Teatrit nga Ministria e Kulturës te Bashkia Tiranë dhe shfuqizim të procedurës së kontratës për ndërtimin e godinës së re të Teatrit Kombëtar. Në parashtrimet e tij, këshilltari ligjor i presidentit Bledar Dervishaj kërkoi që gjykata të marrë në shqyrtim prova shtesë, për sa i përket pronësisë së truallit, praktika e ndjekur për t’i kaluar pronësinë bashkisë si dhe një sërë dokumentesh të tjera mbi projektin, apo lejen e ndërtimit që nga koha e Mbretit Zog.
Në këtë seancë kanë qenë të pranishëm edhe anëtarë të Aleancës për Mbrojtjen e Teatrit që kanë kërkuar që të thirren në cilësinë e dëshmitarëve kryeministri Edi Rama dhe zv.kryeministri Erion Braçe. Godina e Teatrit Kombëtar u shemb një vit më parë me vendim të Këshillit Bashkiak, një vendim i kundërshtuar nga opozita dhe shoqëria civile me protesta të njëpasnjëshme.
