Ka ndërruar jetë në moshën 70-vjeçare, Fitim Gërxhalliu, një emër i njohur në vitet e lulëzimit të firmave piramidale në “97-ën dhe më pas. Ai njihej si shefi i firmës piramidale “Gjallica” e cila sipas dokumentave zyrtare arriti të shkaktonte një dëm prej 332 milionë dollarë të cilat ishin depozituar nga mbi 69 mijë persona.
Firma “Gjallica” u themelua nga Gërxhalliu dhe çifti Shemsie dhe Gani Kadria. Ajo u regjistrua në Gjykatën e Tiranës në dhjetor të vitit 1991 si një bashkim kompanish dhe ortake e vetme ishte Shemsie Kadria.
Në 17 shkurt 1997 u morën të pandehur Gani Kadria dhe miku i tij, Fitim Gërxhalliu. Ndërkohë, Shemsie Kadria ishte larguar nga Shqipëria dhe për të u shpall urdhër-arresti ndërkombëtar.
Në janar 2001, Gjykata e Shkallës së Parë e dënoi me 20 vjet burg Fitim Gërxhalliun, ndërsa në qershor të po atij viti Gjykata e Apelit e uli dënimin në 11 vjet burg ndërsa për Gani Kadrien, nga 20 u dha 10 vjet burg.
Gërxhalliu kishte 8 vjet që kishte dalë nga burgu dhe jetonte në një banesë me qera te Komuna e Parisit, ku dhe ndërroi jetë. Sot, ai u përcoll në banesën e fundit nga të afërmit dhe miqtë e tij duke marrë me vete edhe një pjesë të misterit të kohës kur jetoi. ©LAPSI.al
[caption id="" align="alignnone" width="835"]
Shemsie Kadria[/caption]
