Ka ndërruar jetë aktorja Tanya Roberts, e cila ka luajtur në serinë e famshme “That ’70s Show” dhe ka pasur rol në filmin për agjentin 007, “A View To A Kill”. Ajo humbi jetën në moshën 65-vjeçare. Aktorja amerikane nuk ishte ndjerë mirë në mbrëmjen e Krishtlindjeve, pasi kishte dalë në shëtitje me qenin e saj, raporton “TMZ”. Është më pas ishte dërguar në spitalin “Cedar-Sinai” në Los Angeles, ku ka vdekur të dielën më 3 janar. Vdekja e Robertsit nuk kishte lidhje me COVID-19, kanë raportuar mediat në Amerikë dhe aktorja nuk vuante nga ndonjë sëmundje. Deri më tani nuk është konfirmuar shkaktari i vdekjes së saj nga zyrtarët mjekësorë apo familjarët e aktores. Roberts nuk kishte fëmijë dhe prapa e ka lënë partnerin e saj prej kohësh, Lance O’Brien. Aktorja emri i vërtetë i së cilës ishte Victoria Leigh Blum, u lind në Bronx të New Yorkut. Debutimin në aktrim e shënoi në vitin 1975, me një rol në filmin e zhanrit horror, “Forced Entry”. Ajo më së miri njihet për portretizimin e bukuroshes “Stacey Sutton”, në filmin e vitit 1985, “A View To A Kill”, ku luajti krahas aktorit Roger Moore i cili edhe e shënoi performancën e fundit të agjentit sekret James Bond.
Roberts po ashtu shquhej për rolet në filma të tillë si: “Beastmaster”, “Sheena”, “Night’s Eyes” dhe “Almost Pregnant”.
Sa i përket roleve televizive, Tanya Roberts i ishte bashkuar serisë “Charlie’s Angels” në sezonin e pestë dhe të fundit, që u transmetua në vitin 1980 në kanalin “ABC”. Në fund të viteve ’90 ajo u shfaq me një rol dytësor në serinë “That ’70s Show”. Aktorja ishte larguar nga ky projekt i suksesshëm televiziv i kanalit “FOX”, në sezonin e tij të tretë, për t’u kujdesur për bashkëshortin e saj i cili vuante nga një sëmundje vdekjeprurëse.
