Prokuroria Speciale kërkon masa mbrojtëse për dëshmitarët në çështjen ndaj ish krerëve të Ushtrisë Çlirimtare të Kosovës. Sipas saj, në këtë çështje ka 153 dëshmitarë dhe për të shmangur çdo incident të mundshëm, akuza ka kërkuar marrjen e tyre në mbrojtje.
Në seancën e sotme në Hagë, e cila po mbahet online, mbrojtja e Hashim Thaçit, Kadri Veselit, Jakup Krasniqit dhe Rexhep Selimit, ka kërkuar që gjykimi për krime lufte dhe krime kundër njerëzimit ndaj ish-krerëve të UÇK, të nisë jo më herët se në verën e vitit 2022. Avokati mbrojtës i ish-presidentit të Kosovës, Hashim Thaçi David Hooper dhe ai i ish-kryetarit të Partisë Demokratike të Kosovës, Kadri Veseli, Ben Emmerson, gjatë konferencës pranë Dhomave të Specializuara në Hagë, thanë se ju duhen të paktën 18 muaj që të kryejnë hetime, në mënyrë që të përgatisin mbrojtjen.
Ndërkaq, Zyra e Prokurorit të Specializuar tha se brenda javësh, palës mbrojtëse do t’iu dorëzohen mbi 1,000 materiale shtesë, duke shtuar se mbrojtja ka materiale të mjaftueshme që të nisë hetimet.
Prokuroria pretendon se lënda e saj disponon me gati 100.000 prova.
Organi I akuzës pretendon se për konfirmimin e aktakuzës ka disponuar me material prej rreth 43 mijë faqe, duke përfshirë raporte, deklaratat e dëshmitarëve, fotografi dhe mbi 20 orë material audio-vizive.
