Akuzat e mazhorancës ndaj kryedemokratit Basha kanë vijuar edhe në seancën plenare të kësaj të hëne. Nga foltorja e Kuvendit, kreu i grupit parlamentar socialist, Taulant Balla ka hedhur aludime mbi financimin e PD-së. Ai pretendon se demokratët financohen nga rusët dhe thotë se drejtësia shqiptare ka dështuar të hetojë lidhjen e tyre.
"Për çështjen e financimit të partive politike, ajo është një çështje që duhet forcuar legjislacioni. Nuk e kemi një ligj që garanton që partitë të mos financohen nga para me burime të paligjshme. Dështimi i institucioneve të drejtësisë shqiptare për të hetuar siç duhet rastin e financimit të PD-së të bëj publik me prova se si nga një kompani guackë në Edinbugh të Skocisë, persona të caktuar me origjinë apo me pasaporta ruse ua dhanë zemër për të financuar Lulzim Bashën është një fakt që sot nuk është hetuar, që sot përsëri është një sirenë alarmi se si parti politike mund të bien pre e financimeve nga vende që nuk janë aspak miqësore me Shqipërinë. Biem të gjithë dakord që Rusia nuk është një vend miqësor me Shqipërinë", tha Balla.
