Gjykata e Apelit të Tiranës ka ndryshuar masën e sigurisë për njërin prej 4 të arrestuarve që akuzohen se tentuan të ekzekutojnë biznesmenin Andon Dhima një muaj më parë në Tiranë. Në fakt ka qenë Prokuroria që i ka kërkuar gjykatës të zbusë masën e sigurisë nga “arrest me burg” në “arrest shtëpie” për Mariglen Matohitin.
Sipas Prokurorisë nuk ka pasur prova të mjaftueshme që të implikonin të riun si i përfshirë në atentatin ndaj Dhimës. Dyshimet kanë qenë se i riu ka pasur rolin e vëzhguesit. Ky vendim u mor nga prokurororët edhe pse në shtëpinë e tij, policia gjeti një pistoletë.
Në burg do të vazhdojnë të qëndrojnë Grid Leno, Albin Hoxha dhe Enea Hoxha. Më 15 tetor, biznesmeni Andon Dhima publikoi pamjet e një atentati që sipas tij ishte tentuar t’i bëhej në hyrje të pallatit. Nga pamjet e kamerave të sigurisë duken 2 persona që hyjnë pas tij, por biznesmeni kishte hyrë në ashensor dhe ata u larguan. ©LAPSI.al
