Një burrë 45-vjeçar humbi përgjithmonë dëgjimin pasi u infektua nga COVID-19.
Rasti është i pari në Mbretërinë e Bashkuar dhe ekspertët kanë thënë se humbja e papritur dhe e përhershme e dëgjimit, është e lidhur me infeksionet Covid-19 tek disa njerëz, raporton “The Sun”.
Rasti në Mbretërinë e Bashkuar vjen pasi ekspertët në Universitetin e Mançesterit thanë se njerëzit që janë rikuperuar nga virusi kanë raportuar një përkeqësim të dëgjimit.
Burri kishte 10 ditë që vuante nga simptomat e koronavirusit dhe u transferua në kujdesin intensiv gjatë kohës që kishte vështirësi në frymëmarrje.
Kur u transferua në kujdesin intensiv, ai u vendos në një ventilator për 30 ditë.
Si rezultat, ai zhvilloi ndërlikime të tjera dhe më pas u trajtua me remdesivir, steroid intravenoz dhe një transfuzion gjaku, pas së cilit filloi të përmirësohej.
Një javë pasi doli nga kujdesi intensiv, filloi të dëgjonte zhurma në veshin e majtë dhe shumë shpejt nuk mund të dëgjonte më me të.
Përveç astmës, ai ishte i shëndetshëm dhe kurrë nuk kishte pasur ndonjë problem me dëgjimin.
Ekspertët ekzaminuan kanalet e veshit, ku zbuluan se nuk kishte bllokime ose inflamacion. Nuk ka shkaqe përfundimtare të dëmtimit të dëgjimit, por ai mund të vijojë nga infeksionet virale siç është gripi.
