Sekretari i përgjithshëm i PD-së, Gazment Bardhi ishte në Gjirokastër, nga ku ndoqi nga afër procesin e votimit për kandidatët për deputetë, faza e dytë.
Ndërsa fliste për mediat, për pritshmëritë e fitores së PD-së në zgjedhje, Bardhi tentoi të dëgjohet nga elektorati gjirokastrit duke ngacmuar ndjeshmëritë krahinore apo konceptet Veri-Jug. Sipas Bardhit, rezulton se Partia Socialiste ka diskriminuar "Jugun" e vendit, përfshirë edhe Gjirokastrën.
"Gjatë 7 viteve që qeverisemi nga Rama, jo vetëm Gjirokastra, por gjithë Jugu ka qenë i diskriminuar, ka munguar vëmendja ndaj halleve të qytetarëve dhe biznesit. Braktisje totale nga qeveria. Pritshmëria e PD-së jo vetëm për Gjirokastrën, por gjithë Shqipërinë është fitore e thellë. Në Gjirokastër opozita e bashkuar do të jetë fituese” tha Bardhi.
Nuk është e qartë se kujt pjese të vendit, Bardhi i referohet me "Jug", dhe as nuk dihet nëse në këtë llogjikë, pjesa tjetër e vendit është vetëm Veri, apo aty ka edhe Shqipëri të Mesme. Gjithsesi, veçimi që bën Bardhi nga Gjirokastra se "Jugu" ka qenë i diskriminuar nga Partia Socialiste, nënkupton automatikisht se pjesa tjetër e vendit, pra "Veriu" ka qenë i favorizuar nga qeverisja e Ramës. Një pohim i tillë me siguri që. më shumë se sa ngroh zemrat e qytetarëve të Gjirokastrës, mund të shkaktojë habi tek mbështetësit tradicionalë të PD-së, pa dallim krahine.
