Deklarata e shpërndarë për mediat.
Sot në datë 27 Maj 2020 Kryetari i Partisë Agrare Ambientaliste z. Agron Duka nënshkroi një marrëveshje bashkëpunimi me z. Agim Rrapaj, Kryetar i Këshillit të Agrobiznesit Shqiptar, ku bëjnë pjesë 34 shoqata që përfaqësojne fermerët, agropërpunuesit dhe agroturizmin.
PAA angazhohet të jetë një zë i fortë dhe thellësisht profesional në mbështetje të zgjidhjes së problemeve dhe në bashkëpunimin për hartimin dhe implementimin e strategjive sektoriale dhe sipas rajoneve në funksion të zhvillimit të qëndrueshëm rural bazuar në eksperiencat më të mira ndërkombëtare.
PAA vlerëson se mbështetja për bujqësinë është e pa plotë dhe spontane, fermerët janë në një rrezik të përhershëm të prodhimeve të tyre si për shkak të ekspozimit ndaj fatkeqësive natyrore, nga konkurenca e ashpër jo e lirë dhe jo e ndershme me partnerët e tjerë tregtarë që kanë skema të fuqishme mbrojtjeje dhe subvencionimi direkt dhe indirekt.
PAA synon që si një parti e ardhshme parlamentare të jetë zëri real i shqetësimeve të fermerëve, blegtorëve, peshkatarëve, bletërritësve, i grumbulluesve dhe përpunuesve të prodhimeve bujqësore dhe blegtorale.
Bujqësia shqiptare duhet të mbështetet me skema të qarta, të shpejta dhe efikase të uljes së kostove të prodhimit dhe përpunimit.
Skemat e sigurimit nga fatkeqësitë natyrore të bashkëfinancuara/subvencionuara edhe nga ana e shtetit janë më të domosdoshme se kurrë pasi fatkeqësitë natyrore janë bërë më të shpeshta dhe më shkatërruese.
Skemat e financimeve me kosto më të ulët do të ndihmojnë rritjen e prodhimit.
Rritja e shkallës së përfitimit nga fondet e BE – janë pika e kthimit dhe kalimit drejt një ekonomie bujqësore më moderne dhe më miqësore me ambientin. Ekonomia gri duhet të jetë avantazh i Shqipërisë.
PAA vlerëson se shoqatat e përfaqësimit të agrobiznesit janë një mundësi e jashtëzakonshme për të njohur problemet konkrete në zonat konkrete, për të bashkëpunuar për strategjitë funksionale në çdo sektor të agrobiznesit shqiptar.
Ky bashkëpunim do të jetë i përhershëm dhe do të plotësohet dhe bëhet sa më efektiv në përputhje me dinamikën dhe sfidat e përditshme të çdo sektori të agrobiznesit tonë.
