Zbardhet dëshmia e Ilir Selmanit, i cili u arrestua një ditë më parë në zonën e Xhamllikut, në Tiranë, pasi dyshohet si i përfshirë në ekzekutimin mafioz të ish-efektivit të policisë Santiago Malko në gusht të vitit të kaluar.
Selmani ka mohuar të ketë lidhje me vrasjen, teksa ka thënë para policëve se nuk e njihte fare Santiago Malkon të cilin e kishte parë vetëm në televizor. Ai ka treguar se dilte i armatosur në rrugë pasi i rrezikohej jeta nga kundërshtarët e tij dhe të Leonard Dukës, me të cilin, ka thënë se ka një lidhje miqësore shumë vjeçare.
“Me Leonard Dukën kam lidhje miqësie shumëvjecare. Nuk e kam takuar prej shumë muajsh dhe nuk kam informacion për vrasjen e Santiago Malkos. Nuk e njoh fare, e kam parë vetëm ne televizor që flitej për të. Prej muajsh kam qëndruar i fshehur dhe rralle kur dilja lëvizja i armatosur, sepse me rrezikohet jeta nga kundërshtaret e mi dhe të Leonardit”, - mësohet të ketë thënë Selmani para policëve.
Arrestimi i Selmanit u bë pasditen e djeshme nga Komisariati nr. 2, i cili ka pasur informacion se ai fshihej në një apartament në zonën e Xhamllikut. Zona është mbajtur në vëzhgim nga agjentë të policisë dhe për lokalizimin e Selmanit kanë ndihmuar lëvizjet e bashkëshortes së tij, e cila shkonte e takonte.
