Pas përfundimit të takimit me delegacionin e Komisionit të Venecias për çështjen e pronave, ish-deputetët Jorida Tabaku dhe Oerd Bylykbashi bënë një dalje publike, ku dhanë detaje lidhur bashkëbisedimit në fjalë.
Tabaku u shpreh se ligji i kthimit të pronave është antikushtetues, si edhe një grup tjetër ligjesh që bien ndesh me të drejtën e pronarëve, "ku prona publike dhe ajo private mbeten në duart e Ramës", i cili sipas saj i shpërndan bazuar në interesat vetjake. “Qeveria që nga 2013 e këtej po shkel të drejtat e pronarëve dhe po harton ligje me norma të paprecedenta. Shqetësimi jonë mbetet e drejta për të respektuar pronarin, diskutuam mundësi se si mund të zgjidhet”, tha Tabaku.
Ndërsa, ish-deputeti tjetër i Partisë Demokratike, Bylykbashi, nënvizoi se eliminimi i Gjykatës Kushtetuese është i qëllimshëm, për t'iu mos u dhënë mundësinë e ankimimit pronarëve, pronat e të cilëve u jepen oligarkëve. "Qeveria nuk kthen më prona nuk kompenson, ka rishpronësuar pronarët. Ajo që ne bëmë të qartë është që ky proces vë në pikëpyetje titujt e pronarëve dhe ka për qëllim të marrë prona dhe këto prona t’u jepen oligarkëve. Fikja dhe eleminimi i Gjykatës Kushtetuese është i qëllimshëm, që pronarët të mos kenë mundësi të ankohen në Gjykatë. Ajo që bëmë të qartë është që kur PD të kthehet në pushtet, do t'u kthejë të drejtat pronarëve.”
