Janë zbardhur emrat e 5 deputetëve që do të jenë pjesë e Komisionit Hetimor, i cili pritet të ngrihet në Kuvend për shkarkimin e presidentit të Republikës, Ilir Meta.
Mësohet se komisioni do të përbëhet nga 9 anëtarë në total. Deputeti i Partisë Socialiste, Ulsi Manja, do të vihet në krye të komisionit, ndërsa anëtarët e tjerë nga radhët e mazhorancës do të jenë: Vasilika Hysi, Klotilda Ferhati, Bashkim Fino dhe Alket Hyseni. Ndërsa, 4 anëtarët e mbetur do të përzgjidhen në mesin e deputetëve të opozitës së re parlamentare.
Parlamenti do të mblidhet pasditen e sotme në orën 17:00 në një seancë plenare, për të shqyrtuar kërkesën e PS-së për ngritjen e Komisionit Hetimor për shkarkimin e kreut të shtetit, me pretendimin e shkeljes së Kushtetutës në rastin e dekretit për shtyrjen e zgjedhjeve lokale të 30 qershorit.
Komisioni do të përpilojë një raport që do t’i përcillet Kuvendit. Në rast se shkeljet e evidentuara konsiderohen të rënda, mazhorancës do t’i duhen 94 vota për shkarkimin e Metës, çështje që do të kalojë më tej në Gjykatën Kushtetuese, e cila ende është jashtë funksionit.
Më herët ditën e sotme, përmes një qëndrimi publik, presidenti Meta theksoi se shtryrja e zgjedhjeve ishte kushtetuese dhe se dekreti i tij mbetet në fuqi, për sa kohë që nuk ka një vendim të kundërt të Gjykatës Kushtetuese.
