Një ndeshje për të mos u humbur: e tillë konsiderohet ajo në Selman Stërmasi kundër Tiranës, në një 90 minutësh që mund të vendosë shumë për fatet e dy skuadrave, në përcaktimin se cila do të jetë ajo që do të shoqërojë Kamzën jashtë Superiores. E në këtë pikë, në Krujë janë gati të bëjnë të gjitha lëvizjet për të qenë gati për rëndësinë e ndeshjes. Drejtuesit e klubit, pasi kanë dhënë premion për fitoren fondamentale kundër Flamurtarit e kanë bërë të qartë se shpërblimi do të jetë edhe më i madh në rast të një rezultati pozitiv kundër Tiranës në transfertë.
Kastrioti e ka seriozisht dhe nuk impresionohet aspak nga emri i madh me të cilin duhet të luajë sfidën mbijetesë: kërkesa zyrtare e krutanëve është garanci arbitrimi nga Federata Shqiptare e Futbollit, duke i besuar kështu arbitrave të FIFA-s. Në anën tjetër, për të mbajtur larg presionit skuadrën është menduar grumbullimi dy ditor në Kamëz. Tekniku Bledar Devolli do të ketë mungesën e sigurtë të shkodranit Kalaja, ndërsa ka ende një dilemë përsa i përket mënyrës si ti përballojë bardheblutë, duke qenë se edhe një pikë mund të jetë shumë e vlefshme, me kalendarin në vazhdim.
Statistikat e 2019 janë në favor të formacionit të Devollit, që krahasuar me Tiranën, ka marrë më shumë fitore e ka shënuar më shumë gola. Por kjo vlen vetëm si tregues i formës së mirë të Kastriotit, sepse në një finish me pikë të barabarta, ajo që do të buzqeshë është Tirana, falë ndeshjeve direkte.
