Deputeti Ralf Gjoni, të enjten, tha se nuk do të votonte për një shkarkim të Presidentit Ilir Meta, nëse do të kërkohej nga Kuvendi shkarkimi i tij.
Gjoni deklaroi se nga angazhimi me zotin Meta ka vetëm kujtime të bukura, që i ruan me qetësi dhe fanatizëm.
“Është një periudhë e bukur e jetës sime dhe nuk kam pse ta hedh poshtë. Unë shkarkimin e zotit Meta nuk do ta votoja në Parlament”,- tha ai.
Në lidhje me drejtimin e Lëvizjes Socialiste për Integrim, Gjoni u shpreh se kjo parti është kapur peng nga një marrëzi, duke shtuar se ai nuk ka qenë për çizme, dhunë dhe rrugaçëri.
Sa i përket ndryshimeve zgjedhore, Gjoni tha se vendi ka nevojë për një reformë tjetër zgjedhore.
Sipas tij, sistemi aktual me lista të mbyllura jo vetëm deformon vullnetin e zgjedhësve, por sjell edhe emra deputetësh me cilësi të dobët.
Në lidhje me pranimin e mandatit, tha se nuk ishte një hakmarrje ndaj LSI-së.
Ai është deputeti i 94 i Kuvendit të Shqipërisë, ndërsa këtë të enjte u betua.
Gjoni ka qenë më parë Sekretar i LSI-së për marrëdhëniet me Jashtë, si dhe këshilltar i ish-kryetarit të Parlamentit, Ilir Meta.
