Pas takimit me kryeministrin Rama, homologu i tij grek Alexis Tsipras ka folur në Athinë për negociatat me Shqipërinë duke përmendur avantazhet që ka Greqia në nga pakti i ri. Sipas tij, negociatat nuk kanë përfunduar ende, por takimet mes ministrave të jashtëm do të konkludojnë në në pakt sa më shpejt të jetë e mundur.
"Jemi në një pikë shumë të rëndësishme, por nuk mund të themi se kemi përfunduar. Ne jemi shumë afër një zgjidhjeje që ka të bëjë me përcaktimin e Zonës Ekonomike Ekskluzive, një zgjidhje që i jep avantazhe të rëndësishme anës greke, por nuk dua të hyj në detaje. Herën tjetër që të dy ministrat e jashtëm do të takohen, do të dyfishojnë përpjekjet e tyre, pa pasur ndonjë presion të veçantë për të parë se deri në çfarë mase mund të kemi një zgjidhje pozitive sa më shpejt të jetë e mundur" u shpreh kryeministri grek.
Sipas mediave greke marrëveshja pritet që të shtyhet për në muajt në vijim për shkak të presionit të opozitës greke kundër Alexis Tsipras pas marrëveshjes me Maqedoninë për emrin. Opozita në vendin fqinj akuzon kryeministrin Tsipras se marrëveshja me Shqipërinë nuk është në favor të Greqisë. Ndërsa duket se presioni në Athinë detyroi Alexis Tsipras që të shtynte firmosjen e paktit me Shqipërinë për pak kohë.
