Ish-ministri i Brendshëm Saimir Tahiri ka kërkuar heqjen e masës “arrest shtëpie” dhënë nga Gjykata e Krimeve të Rënda. Seanca do të zhvillohet paraditen e së hënës në gjykatën e Apelit të Krimeve të Rënda. Në të njëjtën ditë do të shqyrtohet edhe kërkesa e prokurorëve që kërkojnë “arrest me burg” për ish-ministrin e Brendshëm.
Për këtë çështje ka bërë një koment ambasadori amerikan në Tiranë, Donald Lu i cili i pyetur nga Balkanweb tha se vendimi duhet të bazohet mbi provat dhe ligjin dhe jo mbi presione.
“Kemi dëgjuar disa raportime nga burime të pavarura për presione serioze në këtë çështje, përfshirë edhe ryshfete që u janë ofruar gjykatësve. Ne i bëjmë thirrje shoqërisë civile dhe medias që ta vëzhgojnë këtë çështje me vëmendje, në mënyrë që vendimi të bazohet mbi provat dhe ligjin dhe jo mbi presione, kërcënime apo para. Askush nuk është mbi ligjin”- ka thënë Donald Lu.
