Duket se PD është e vendosur që komisioni hetimor për çështjen ‘Tahiri’ të vazhdojë punën e tij. Ka qenë kreu i këtij komisioni, Edi Paloka ai i cili ka paralajmëruar padi për institucionet që tentojnë të bllokojnë punën e komisionit.
“Të gjitha institucionet kryesore që marrin urdhra nga Edi Rama s’kanë sjellë informacion. Do zbatoj pike për pike kodin penal për kë nuk jep informacion duke penguar komisionin hetimor”, - tha Paloka duke e quajtur të qëllimshme mungesën e ardhjes së informacionit.
Debati ka qenë për pajisjen e deputetëve të komisionit me certifikatë sigurie që nuk e kanë të gjithë. Opozita akuzon kryeministrin që po pengon qëllimisht punën e komisionit, pasi DSIK është institucion në varësi të kryeministrit dhe është ai që nuk ka bërë pajisjen, ndërkohë që për informacion paraqet si argument mospasjen e kësaj certifikate nga deputetët.
