Eleni Foureira është zyrtarisht përfaqësuesja e Qipros, në skenën e Festivalit të Këngës në "Eurosong 2018". Por, në vend që ajo të përqendrohet në performancën e saj artistike, me sa duket i duhet të "zërë veshët më dorë", sepse po e sulmojnë nga të gjitha anët.
Diçka të tillë, këngëtarja e njohur e ka shprehur në një intervistë që do të transmetohet të dielën e ardhshme në emisionin "Tet a tet" në televizionin publik të Qipros. Sipas gazetës Express, Eleni i quajti pa vend këto reagime mbi origjinën e saj, duke shtuar më tej se: "Është e turpshme të dëgjosh nga një i ri të thotë “a, je nga Shqipëria, atëherë me Shqipërinë të shkosh në Eurovizion. Shkon në një shtëpi diskografike dhe nuk të pranojnë sepse je nga Shqipëria. Thua me veten, a është e mundur? Nuk e bëj dot ëndrrën time realitet sepse jam nga Shqipëria”!
Vërtet që reagime të tilla nuk i bëjnë mirë imazhit të saj si artiste, çka e ka shtyrë që të bëj këtë deklaratë "bombë"! Kënga me të cilën Eleni Foureira do të prezantojë Qipron në Festivalin Europian të Këngës është publikuar dhe mban titullin Fuego.
