Si çdo vit, votimet mes kolegësh në festivalin "Kënga Magjike" ngjallën pakënaqësi, madje ndezën gjakrat. Fitorja e Aurela Gaçes për të dytin vit rradhazi, u komentua edhe në media, e cila hodhi dyshime për pazare mes artistëve. Për këtë diskutim, këngëtarja vlonjate ka një përgjigje që duket se i mbyll gojën të gjithë atyre që dyshuan në triumfin e baladës "Akoma jo".
"Unë jam shumë e lumtur që kjo mënyrë votimi erdhi nga vetë artistët. Është shumë, po shumë qesharake të mendosh për dallavere, po çfarë dallaveresh kur çdo gjë është e hapur. Unë mund të kem 5 miq që konkurronin me mua edhe ja ta zëmë ata do më kishin votuar, ja ta zëmë dhe 5 të tjerë i paskam blerë (qesh), po të tjerët? Sepse vinin pikë edhe nga asrtistë shumë të rinj, edhe nga ata me eksperiencë. Votimet dalin online, secili ka vënë firmën në fund të fletës." - shprehet Aurela Gaçe ndërsa thotë se të ardhurat e çmimit do t'i çojë për bamirësi.
"Do të doja që gazetaria, një herë të vetme të shtronte një pyetje: Pse ju artistë që e doni kaq shumë publikun dhe e mashtroni atë duke i bërë të blejnë biletën të të shohin ty, ju nuk këndoni live? E kam në përgjithësi këtë për epideminë që ka zënë artin ton. Pse mediat nuk e shtrojnë këtë pyetje: Si ka mundësi që në 7 milion shqiptarë mbarë botës, ndodh që te ne një këngë merr një million klikime për 5 ditë. Mendohuni njëherë si mund të jetë e vërteta, çfarë mund të më shtyjë mua të mos pranoj t’i bëj këto lloj mashtrimesh?" - thotë këngëtarja për Panorama.
