Presidenti amerikan, Donald Trump, ka deklaruar se Shtetet e Bashkuara dhe Irani kanë arritur një dakordësi që do t’i hapë rrugë nisjes së negociatave zyrtare mes dy vendeve. Trump ka theksuar se Teherani ka pranuar të mos zhvillojë kurrë armë bërthamore. Sipas Trump, ky ka qenë objektivi kryesor i politikës amerikane ndaj Iranit dhe një hap i rëndësishëm drejt uljes së tensioneve.
“Ne i dhamë fund luftës me Iranin. Ata ranë dakord të mos kenë kurrë armë bërthamore. Ky ishte qëllimi ynë dhe arsyeja kryesore e gjithë kësaj përpjekjeje”, deklaroi ai.
Megjithatë, autoritetet iraniane kanë mohuar se është arritur një marrëveshje përfundimtare. Zëdhënësi i Ministrisë së Jashtme të Iranit, Esmaeil Baqaei, tha se negociatat vijojnë. Sipas tij, deri tani nuk është marrë asnjë vendim final.
“Deri në këtë moment, Irani nuk ka arritur në një përfundim përfundimtar lidhur me marrëveshjen”, u shpreh ai.
Ndërkohë, Izraeli, i cili nuk është pjesë e drejtpërdrejtë e negociatave, ka ndjekur nga afër zhvillimet. Zyra e kryeministrit Benjamin Netanyahu njoftoi se Trump dhe Netanyahu kanë zhvilluar një bisedë telefonike lidhur me memorandumin e mirëkuptimit që po finalizohet mes Uashingtonit dhe Teheranit. Sipas njoftimit, Netanyahu ka kërkuar që çdo marrëveshje e ardhshme të garantojë eliminimin e materialeve bërthamore, çmontimin e kapaciteteve të pasurimit të uraniumit, kufizimin e programit raketor iranian dhe ndalimin e mbështetjes së Iranit për grupet e armatosura aleate në rajon.
