Mirlinda Karçanaj, ish-drejtoresha e Agjencisë Kombëtare të Shoqërisë së Informacionit, është paraqitur këtë të martë në Prokurorinë e Posaçme (SPAK) në zbatim të masës së sigurisë “detyrim paraqitje”. Ajo është marrë në hetim për dosjen e AKSHI-t, ku Karçanaj dhe persona të tjerë, mes tyre Ergys Agasi dhe Ermal Beqiri akuzohen si pjesë e një grupi të strukturuar kriminal.
Sipas SPAK, Ergys Agasi dhe Ermal Beqiri konsiderohen si dy nga personat kyç të skemës së dyshuar. Ata akuzohen për konkurrencë të paligjshme përmes dhunës dhe presionit, heqje të paligjshme të lirisë, shkelje të barazisë në tendera, grup të strukturuar kriminal dhe pastrim parash. Hetimet tregojnë se ata dyshohet se kanë ushtruar intimidim ndaj përfaqësuesve të kompanive pjesëmarrëse në tendera, me qëllim tërheqjen e ankimimeve dhe favorizimin e fituesve të caktuar.
Të dy biznesmenët janë aktualisht në kërkim.
