Edi Rama sulmoi protestuesit, duke i cilësuar si “bulevardin e sorrave dhe korbave”.
Nisur nga përgatitja e fjalimit të tij nga zyra përballë sheshit të protestës, që do e mbajë nesër në mbledhjen e grupit të PS, ai ndau një video-mesazh në Facebook me sfondin e thirrjes së mijëra qytetarëve për dorëheqjen e tij.
Kryeministri gjithashtu ka kënduar edhe refrenin e protestës: “Rama jepe dorëheqjen”, teksa në sfond ka edhe ekranin e kompjuterit të tij, ku dallon një pjesë e fjalimit, me nëntekst për ata votues të PS që i kanë dalë kundër.
“Përshëndetje, nuk e di a dëgjoni, kjo është kënga ime e preferuar. Jam duke shkruar fjalën për nesër, në mbledhjen e grupit Parlamentar dhe Qeverisë dhe desha të ndajë me ju këtë moment sepse është një kor që më ezalton; ‘Rama jepe dorëheqjen”. Shihemi nesër paradite, nuk e di orën e saktë, mbledhja fillon në 9.30, por ishte kënaqësi që të ndaja me të gjithë reflektimin tim mbi pasqyrën e bulevardit të flamingove. Ai që ishte, se ky që ka mbetur është i sorrave dhe korbave”, thotë kryeministri në videomesazh.
Kurse në tekst karshi postimit ai nënvizon se:
“Mirmroma ka Tirona e kontradiktave. Zhurm, zhurm, shumë shumë zhurmë. Përgatitje me audio live nga bulevardi. Kush ka interes nesër paradite do jem me ju”.
