Pasi deputetët e opozitës bllokuan foltoren e Kuvendit dhe penguan vijimin normal të seancës, mazhoranca vendosi të kalojë në proces votimi. Me kërkesë të Partisë Socialiste, projektaktet u hodhën në votim, ndërsa deputetët e opozitës vijuan të qëndronin pranë foltores në shenjë proteste.
Vetëm me votat e mazhorancës u miratuan rezolutat për vlerësimin e veprimtarisë së SPAK-ut dhe gjashtë institucioneve të tjera kushtetuese e të pavarura. Po ashtu, Kuvendi miratoi edhe aktin normativ për ndryshimet në buxhetin e shtetit për vitin 2026, si dhe aktin normativ që parashikon financimin e pjesshëm të aktivitetit kulturor-turistik ndërkombëtar, përmes të cilit qeveria akordoi 4.3 milionë euro për organizimin e koncertit të reperit amerikan Kanye West në Tiranë.
Rezultatet e votimeve:
Projektrezoluta për veprimtarinë e Këshillit të Lartë Gjyqësor – 84 vota pro, 1 abstenim, 2 kundër.
Projektrezoluta për veprimtarinë e Këshillit të Lartë të Prokurorisë – 83 pro, 1 abstenim, 3 kundër.
Projektrezoluta për veprimtarinë e Kontrollit të Lartë të Shtetit – 82 pro, 1 abstenim, asnjë kundër.
Projektrezoluta për veprimtarinë e Prokurorisë së Përgjithshme – 83 pro, 1 abstenim, asnjë kundër.
Projektrezoluta për veprimtarinë e SPAK-ut – 83 pro, 1 abstenim, 1 kundër.
Projektrezoluta për veprimtarinë e Avokatit të Popullit – 83 pro, asnjë abstenim, asnjë kundër.
Projektrezoluta për veprimtarinë e Inspektorit të Lartë të Drejtësisë – 81 pro, 1 abstenim, 3 kundër.
Akti normativ për ndryshimet në buxhetin e vitit 2026 – 82 pro, asnjë abstenim, 3 kundër.
Akti normativ për financimin e pjesshëm të aktivitetit kulturor-turistik me përmasa ndërkombëtare – 80 pro, asnjë abstenim, 6 kundër.
