Sali Berisha ka reaguar ashpër ndaj vlerësimit që iu bë në Durrës Bardhyl Agasi gjatë ceremonisë së 35-vjetorit të Partisë Socialiste, duke e cilësuar atë si një “akt lëpirjeje publike” të kryeministrit Edi Rama ndaj familjes së Ergys Agasi.
Në reagimin e tij, Berisha pretendon se dekorimi i Bardhyl Agasit nuk kishte lidhje me kontributin politik në Durrës, por me raportin e afërt që sipas opozitës, Ergys Agasi ka pasur prej vitesh me pushtetin dhe grupet kriminale. “Ky është një paralajmërim i fortë dhe serioz për prokurorinë: ‘Mos guxoni të hetoni apo të kërkoni pasuritë e krimit të Agasit Junior’”, shkruan Berisha.
Kreu i demokratëve e quan Ergys Agasin “koordinator të kartelave të drogës” dhe “kontakt të Ramës me bandat”, ndërsa pretendon se ai disponon materiale komprometuese për njerëz të pushtetit. “Rama beson gabimisht se duke e ngjitur më lart në shtyllën e turpit Agasin Babë, do të arrijë t’i mbyllë gojën Agasit Junior”, shprehet Berisha në reagimin e tij.
Në aktivitetin e organizuar nga socialistët në Durrës për 35-vjetorin e PS, Bardhyl Agasi u nderua publikisht nga Rama si një prej figurave të hershme të Partisë Socialiste në qytet.
Statusi i plotë i Sali Berishës në rrjetet sociale
Miq, pas përgjërimit disa ditë më parë për "virgjëreshën e korrupsionit", Lindën e gjorë të AKSHI-t, Edi Rama kreu dje në Durrës një tjetër akt të rëndë lëpirje publike. Këtë herë ndaj vetë Ergys Agasit, duke dekoruar me pompë dhe salltanet babanë e tij, Bardhyl Agasin, si "qytetar shembullor" të Durrësit, me meritë të vetme ndaj qytetit, kapo-mafian Gysi. Socialisti i dekoruar nga Rama është babai i Ergys Agasit, koordinatorit famëzi të kartelave më të fuqishme të drogës në Evropë dhe kreut të grupit të strukturuar kriminal të AKSHI-t. Gysi famoz akuzohet si organizator i pengmarrjeve dhe zhdukjeve të biznesmenëve e punonjësve në AKSHI —kopshtit privat të Edi Ramës. Ai është autori i krimeve më të rënda shtetërore, që nga vjedhja dhe eksportimi i të dhënave më private të qytetarëve shqiptarë, e deri te zhvatja e qindra milionë eurove në tendera publikë dhe pasuri publike. Ky është njeriu që mban qindra e mijëra video, regjistrime, foto dhe dokumente komprometuese për Ramën, Lindën e AKSHI-t dhe Lindën e Surrelit, baxhanakun Armand Frangu e të tjerë.
Në fakt, nuk dihet nëse Bardhyl Agasi ka përfituar nga pronat dhe pasuritë e vjedhura prej Ergysit, apo nëse ka hapur ndonjë shishe 36 mijë euro Romanée-Conti si Rama me të birin. Por, deri më sot, ai nuk ka thënë asnjë fjalë. Nuk ka kërkuar kurrë falje që rriti një nga monstrat më të mëdhenj të krimit dhe as nuk ka dënuar krimet e të birit. Prandaj, dekorimi i tij është një fyerje dhe poshtërim i rëndë. Është fyerje për çdo socialist të ndershëm që sheh se dekoratat e qeverisë shkojnë për familjet mafioze, dhe njësoj është fyerje për qytetarinë durrsake e për çdo shqiptar.
Këtë kreu i meduzës së krimit, Edi Rama, e di shume mirë. Ai e di gjithashtu se kjo dekoratë do të përbënte lajm botëror. Sipas kodit të mafies, ky dekorim u thotë qytetarëve të Durrësit se elitë bëhesh vetëm kur je mafioz, duke u dhënë mesazhin: "Mos guxoni të përçmoni Agasët, sepse ata janë paria e qytetit". Ky është gjithashtu një paralajmërim i fortë dhe serioz për prokurorinë: "Mos guxoni të hetoni apo të kërkoni pasuritë e krimit të Agasit Junior te Agasi Babë (fisniku mafioz i PS-së), sepse do të ndëshkoheni rëndë".
Pavarësisht këtij turpi, Edi Rama e ndërmori këtë akt sepse ai dhe familja e tij janë pengje të krimeve të veta, të faktuara dhe të dokumentuara mirë në arkivin e Gysit. Rama beson gabimisht se duke e ngjitur më lart në shtyllën e turpit Agasin Babë, do të arrijë t'i mbyllë gojën Agasit Junior. Drejtesia vonon por nuk harron!
