Rusia ka rritur ndjeshëm kërcënimet ndaj Kievit, duke paralajmëruar “sulme të vazhdueshme”, ndërsa u ka bërë thirrje qytetarëve amerikanë që të largohen nga kryeqyteti ukrainas. Një ditë pasi Moska sulmoi rajonin e Kievit me qindra dronë dhe një raketë të re hipersonike, ministri i Jashtëm rus, Sergei Lavrov, telefonoi sekretarin amerikan të Shtetit, Marco Rubio, më 25 maj, duke i kërkuar që të evakuojë stafin diplomatik dhe qytetarët amerikanë nga Kievi. Rusia i justifikoi këto kërcënime duke iu referuar një sulmi ndaj një konvikti shkollor në rajonin e Luhanskut, që është nën kontrollin rus.
Në telefonatën me Rubion, Lavrov paralajmëroi se Moska po planifikon të kryejë “sulme të vazhdueshme” ndaj objektivave ushtarake ukrainase në Kiev dhe ndaj “qendrave përkatëse të vendimmarrjes”.
Përmes një deklarate tjetër, Ministria e Jashtme ruse tha se ambasadat e huaja janë informuar për mundësinë e sulmeve të reja që do të shënjestrojnë “ndërmarrjet e industrisë së mbrojtjes ukrainase” në Kiev. Departamenti amerikan i Shtetit nuk dha ndonjë deklaratë të detajuar për telefonatën e Rubios. Megjithatë, duke folur për gazetarët gjatë një vizite në Indi, Rubio konfirmoi paralajmërimin e Lavrovit.
“Kievi është një vend shumë i rrezikshëm tashmë prej vitesh”, tha ai. Ministria e Jashtme e Ukrainës e përshkroi paralajmërimin rus si “shantazh të paturpshëm”, që synon të frikësojë diplomatët e huaj dhe organizatat ndërkombëtare me bazë në Kiev. Ministria akuzoi Moskën se po përpiqet “të përhapë panik” dhe tha se kërcënimi për sigurinë nga Rusia “mbetet i njëjtë si në vitet dhe muajt e mëparshëm”.
