Një mesazh gjigant i shkruar përballë Kryeministrisë ishte simbolika e protestës së 47 radhazi kundër qeverisë së Edi Ramës. Me mbishkrimin "Rama-Balluku, SPAK YOU!", protestuesit i kërkuan Prokurorisë së Posaçme të hetojë zyrtarët më të lartë të qeverisë. Ashtu si çdo mbrëmje, qindra qytetarë u mblodhën fillimisht para godinës së Kryeministrisë, ku u mbajtën fjalime. Më pas zhvilluan marshimin në rrugët kryesore të Tiranës, duke kërkuar dorëheqjen e kryeministrit dhe ndryshimin e klasës politike.
Gjatë tubimit, aktivistët shprehën mbështetjen për SPAK-un dhe Gjykatën e Posaçme, por theksuan se presin që hetimet të shtrihen edhe ndaj zyrtarëve më të lartë të shtetit.Pas përfundimit të fjalimeve, protestuesit nisën marshimin nëpër rrugët e kryeqytetit, ku u dëgjuan thirrje si "Rama, jep dorëheqjen!", "Ju erdhi fundi!", "Shqipëria kërkon revolucion" dhe slogane të tjera kundër qeverisë.
Në mbyllje të tubimit, qytetarët u rikthyen sërish para Kryeministrisë, duke përsëritur se protesta do të vijojë edhe në ditët në vijim, deri në dorëheqjen e kryeministrit Edi Rama.
