Një propozim dypartiak për një ligj për Serbinë, i cili lidhet me mbështetjen për sundimin e ligjit, punën e pavarur të institucioneve dhe përcaktimin e përgjegjësisë, i është dërguar të premten Senatit amerikan për shqyrtim. Propozimin e kanë paraqitur së bashku dy senatorë, republikani Chuck Grassley dhe demokrati Richard Blumenthal.
Në uebfaqen e Senatit thuhet se propozimi i ligjit është dorëzuar në procedurë, ndërsa vetë teksti ende nuk është publikuar. Para se një ligj të mund të miratohet nga Kongresi, ai duhet të kalojë paraprakisht si në Senat, ashtu edhe në Dhomën e Përfaqësuesve.
Çfarë i parapriu këtij propozimi?
Në fund të gushtit, propozimin për ligjit në Dhomën e Përfaqësuesve të Kongresit e paraqitën kongresistët, republikani Joe Wilson dhe demokrati Bill Keating.
“U jam mirënjohës senatorëve Grassley dhe Blumenthal që e paraqitën propozimin e ligjit ‘Serbia’ në Senat. Regjimi i Vuçiqit po lufton dëshpërimisht për të qëndruar në pushtet. Zgjedhjet në Serbi duhet të jenë të lira dhe të ndershme”, shkroi Ëilson në rrjetin X.
Në propozimin që Wilson dhe Keating paraqitën në Kongres, thuhet se Shtetet e Bashkuara duhet të vendosin sanksione financiare dhe regjim vizash ndaj aktorëve të dëmshëm që kontribuojnë në destabilizimin e Ballkanit Perëndimor, si dhe ndaj personave që rrezikojnë paqen, sigurinë, stabilitetin ose integritetin territorial të cilësdo zonë apo shteti në rajon.
Aty thuhet se ka “prapambetje serioze në fushën e demokracisë”, e cila, siç theksohet, është përmendur në Raportin e Parlamentit Evropian për Serbinë për vitin 2025. Konkretisht, propozohet që SHBA-ja ta pezullojë dialogun strategjik me Serbinë nëse në këto bisedime nuk trajtohen çështjet e zgjedhjeve të lira dhe të ndershme, si dhe lidhjet e Beogradit me Pekinin dhe Moskën. Nëse Departamenti amerikan i Shtetit nuk e bën këtë, thuhet në propozim, Kongresi, i cili është përgjegjës për fondet publike, nuk duhet t’ia miratojë buxhetin për funksionimin e tij.
Çfarë është dialogu strategjik?
Dialogu strategjik mes Serbisë dhe SHBA-së rinisi me nënshkrimin e Memorandumit të Bashkëpunimit në fushat e energjisë dhe infrastrukturës në korrik të këtij viti, një vit e gjysmë pasi të dyja shtetet nënshkruan marrëveshjen e parë strategjike. Shtetet e Bashkuara kanë marrëveshje të këtij lloji me shumë shtete të botës, me synim thellimin e bashkëpunimit në ekonomi, çështjet e sigurisë dhe politikën e jashtme./REL
