Nga Gautier Lecardonnel, CourrierPicard.fr/ Ermal Beqiri u rikthye në gjykatën franceze të Amiens këtë të premte, më 23 tetor 2026. Pas kërkesës së tij për lirim, të shqyrtuar tre ditë më parë nga gjykata, biznesmeni shqiptar dëgjoi vendimin e gjyqtarëve: “Refuzuar”.
Ai do të mbetet pas hekurave teksa gjykata do të vendosë për fatin e tij, nëse do t'u dorëzohet apo jo autoriteteve shqiptare.
Shqiptari i cili banon në Château d'Auteuil në Berneuil-en-Bray (Oise), refuzon kërkesën për ekstradim të dërguar nga Tirana. Zyra e prokurorit special anti-korrupsion në Tiranë (SPAK) dyshon se ai është pjesë e trurit organizator të një rrjeti që siguroi kontrata IT të qeverisë shqiptare duke manipuluar konkurrencën dhe duke përdorur frikësimin. Çështja ka shkaktuar një trazirë të madhe në Shqipëri: 19 procedura të prokurimit publik, me një vlerë totale të vlerësuar prej 59 milionë eurosh, janë nën hetim.
Shqipëria i ka dorëzuar dokumente sistemit francez të drejtësisë. Në gusht, dhoma hetimore franceze kërkoi informacione të mëtejshme përpara se të merrte një vendim. Këtë të premte, ajo shqyrtoi kërkesën për ekstradim në themel, pas reagimeve nga sistemi i drejtësisë shqiptare: një letër nga Ministri i Drejtësisë, një tjetër nga kreu i zyrës së prokurorit antikorrupsion në lidhje me garancitë ligjore dhe një e tretë nga Drejtoria e Përgjithshme e Burgjeve.
Në mbrojtjen e tij, avokati Nicolas Paganelli argumentoi se këto dokumente ishin po aq të dyshimta në formë sa edhe në përmbajtje: "Këto janë drafte, jo punë serioze. Ju nuk jeni shërbimi pas shitjes për siguri diplomatike të paplota", deklaroi ai. Në bankën e të akuzuarve, i pandehuri shpjegoi se sa e vështirë ishte të besonte në sistemin e drejtësisë së vendit të tij: "Nëse kam korruptuar dikë, është shteti. Por nga ajo anë, askush nuk është në burg. Ka ende një problem. Kjo çështje është thjesht politike”.
Zyra e prokurorit publik të Amiens, nga ana e saj, beson se ekstradimi duhet të ndodhë: "Ju po tetoni të mbani një qëndrim mbi sistemin gjyqësor shqiptar, por ky nuk është roli i dhomës së hetimit", argumentoi prokurori publik, i cili e kishte përmbledhur tashmë çështjen: "Në Shqipëri ka një mbulim të organizuar në shkallë të gjerë" – tha ai.
Beqiri u arrestua në fund të korrikut në Méaulte pranë Albert, pasi fluturoi aeroplanin e tij mbi termocentralin bërthamor Penly (Seine-Maritime). ©Marrë nga “Courrier Picard”. Përshtati në shqip LAPSI.al
