Rreth 100 kilogramë kokainë janë sekuestruar në aeroportin e Athinës, pasi droga ishte fshehur në një ngarkesë me trëndafila të freskët të ardhur nga Kolumbia. Skai.gr shkruan se operacioni është zhvilluar mbrëmjen e së mërkurës në aeroportin “Eleftherios Venizelos”, në bashkëpunim mes autoriteteve greke dhe agjentëve amerikanë të DEA-s.
Gjatë aksionit janë arrestuar gjashtë persona, ndërsa mes tyre dyshohet se ka edhe shtetas shqiptarë. Sipas hetimeve paraprake, kokaina ishte kamufluar mes luleve, me qëllim shmangien e kontrolleve dhe futjen e saj në territorin grek.
Autoritetet po hetojnë për të zbuluar personat e tjerë që mund të jenë të përfshirë në trafikun e drogës, si dhe destinacionin ku ishte planifikuar të dërgohej ngarkesa. Policia Greke dhe DEA vijojnë hetimet për të zbardhur të gjithë rrjetin e dyshuar të trafikut ndërkombëtar të kokainës.
