Detaje të reja kanë dalë nga vrasja në Roskovec, ku 35-vjeçari Refit Buzi dyshohet se ekzekutoi ish-vjehrrin e tij, plagosi ish-vjehrrën dhe më pas u largua nga vendi i ngjarjes së bashku me ish-të fejuarën. Vëllai i viktimës thotë se krimi ishte i paralajmëruar. Sipas tij, autori kishte kërcënuar vazhdimisht familjen, duke u zotuar se do të hakmerrej nëse ish-e fejuara nuk rikthehej me të.
“Dëgjuam vetëm zhurmë dhe që bërtisnin brenda. Ne nuk mund të hynim sepse nuk kishim armë. Ai thoshte: ‘Ejani se do t’ju vras të gjithëve’. Policia ka ardhur pas një ore. E mori djali në telefon. Autori ishte i armatosur. Doli nga dritarja, nga pjesa e pasme e shtëpisë, sepse e kishte lënë aty makinën. Mori dhe çupën me vete dhe iku. Vajza qëndronte këtu. Kishin vite të fejuar, por kishin probleme. Ka shkuar 3 herë në polici, është arrestuar. Shkoi në Tiranë para disa muajsh me armë lodër dhe e futën brenda. Tani ishte në arrest shtëpie, kërcënonte gjithmonë. I thoshte vajzës: ‘Ti do të vish tek mua, pa mua ti nuk e bën dot jetën’. Bënte shantazhe. Kjo ishte një vrasje e paramenduar”, u shpreh ai.
Sipas familjarëve, 35-vjeçari kishte qenë disa herë në konflikt me ligjin dhe kishte ushtruar vazhdimisht presion ndaj ish-të fejuarës. Policia vijon kërkimet për kapjen e autorit, i cili mbetet në arrati.
