Janë zbardhur detaje të reja nga ngjarja e rëndë e regjistruar mbrëmjen e së dielës në lagjen “Vullnetari” në qytetin e Elbasanit, ku mbetën të plagosur me armë zjarri tre persona.
Burime nga grupi hetimor konfirmojnë se shënjestër e këtij sulmi dyshohet se kanë qenë Armando Tomorrica dhe Renaldo Mance, ndërsa i plagosur aksidentalisht ka mbetur 19-vjeçari Biorgi Hoxha, i cili punonte si kamarier në lokal.
Sipas hetimeve paraprake, autori i dyshuar kishte pasur një konflikt të mëparshëm me Tomorricën dhe Mancen, çka dyshohet të ketë qenë motivi kryesor i sulmit. Mbrëmjen e ngjarjes, dy shënjestrat ndodheshin të ulura në një tavolinë në verandën e lokalit, në shoqërinë e kamarierit të ri. Autori është afruar drejt tyre, i ka ofenduar verbalisht dhe më pas ka nxjerrë armën, duke qëlluar disa herë dhe plagosur të tre personat.
Në vendngjarje janë sekuestruar 6 gëzhoja për ekspertizë balistike. Të plagosurit morën ndihmë mjekësore në Spitalin e Elbasanit dhe janë larguar në banesat e tyre, pasi janë jashtë rrezikut për jetën. Policia vijon kontrollet intensive për kapjen e autorit që është ende në arratisje.
