Policia e Kukësit ka finalizuar brenda 24 orëve dy operacione për goditjen e kultivimit të bimëve narkotike dhe kapjen e personave të shpallur në kërkim për vepra penale në fushën e narkotikëve. Operacionet e koduara “Kalimashi” dhe “Zabeli” çuan në arrestimin e dy shtetasve, si dhe në sekuestrimin e lëndëve narkotike dhe asgjësimin e bimëve të kultivuara.
Në kuadër të operacionit “Kalimashi”, shërbimet e Komisariatit të Policisë Kukës arrestuan në flagrancë shtetasin F. L., 34 vjeç, banues në Kukës. Ai u kap duke u kujdesur për 60 bimë të dyshuara narkotike Cannabis Sativa, të cilat dyshohet se i kishte kultivuar në territorin e fshatit Kalimash.
Një pjesë e bimëve u sekuestrua si provë materiale, ndërsa pjesa tjetër u asgjësua nga policia përmes djegies. Ndërkohë, gjatë vijimit të operacionit “Zabeli”, të nisur më 11 korrik 2026, specialistët e Seksionit për Hetimin e Narkotikëve dhe Trafiqeve, në bashkëpunim me Sektorin Operacional, Forcën e Posaçme “Shqiponja” dhe Komisariatin e Policisë Kukës, bënë të mundur lokalizimin dhe ndalimin e shtetasit F. R., 63 vjeç, banues në fshatin Gështenjë.
Ai ishte shpallur në kërkim pasi Gjykata kishte caktuar ndaj tij masën e sigurisë “Arrest në burg” për veprat penale “Prodhimi dhe shitja e narkotikëve” dhe “Kultivimi i bimëve narkotike”. Sipas policisë, 63-vjeçari, në bashkëpunim me djalin e tij M. R., dyshohet se kishte kultivuar 215 bimë Cannabis Sativa në territorin e fshatit Gështenjë. Gjatë kontrolleve në banesën e tyre, uniformat blu gjetën dhe sekuestruan edhe 3 kilogramë lëndë të dyshuar narkotike Cannabis Sativa. Për këtë rast janë proceduar penalisht edhe bashkëshortja e të ndaluarit dhe kryetari i fshatit Gështenjë, ndërsa policia vijon punën për kapjen e shtetasit M. R., i cili rezulton ende në kërkim. Materialet procedurale për të dyja rastet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Kukës për veprime të mëtejshme.
