Ishte 3 shtatori i vitit 2025, kur 13-vjeçarja Kim Joo-e bëri paraqitjen e saj të parë publike përkrah babait të saj, udhëheqësit të Koresë së Veriut, Kim Jong-un, gjatë një parade të madhe ushtarake në Pekin.
Atë ditë, të gjithë sytë ishin tek vajza e vogël që qëndronte pranë njeriut të fortë të Koresë së Veriut. Kjo nuk ishte rastësi, pasi atëherë, rreth 1 vit e gjysmë më parë, ndodhi kalimi i saj nga skena kombëtare në atë ndërkombëtare.
Në atë kohë, kishte shumë që e “lexuan” këtë shfaqje të vajzës së udhëheqësit gjithmonë të kujdesshëm të Koresë së Veriut si “fazën e fundit drejt trashëgimisë”.
Disa muaj më vonë, këto interpretime u konfirmuan pasi, siç u bë e ditur këtë të enjte, zgjedhja e Kim Jong-un për pasuesin si udhëheqës të Koresë së Veriut është vajza e tij.
Pra, kur Ju-E të zëvendësojë Kim Jong Un, ajo do të bëhet gruaja e parë që do të udhëheqë vendin që nga themelimi i tij në vitin 1948.
Kjo është arsyeja pse paraqitja e vajzës së re në Pekin nuk ishte gjë tjetër veçse një mundësi e parë që pasardhësja e Kim të shihej.
“Ky nuk është vetëm një udhëtim familjar, por në fakt “hyrja e saj në skenë si trashëgimtare e dukshme”, - thotë Lim El-sul, një profesor në Institutin e Studimeve të Lindjes së Largët të Universitetit Kyungnam.
Në të kaluarën, sipas tij “kemi parë trashëgimtarë që në përgjithësi e forcojnë pozicionin e tyre duke shkuar në Kinë ose duke marrë pjesë në ngjarje ndërkombëtare për të fituar legjitimitet nga forcat socialiste”.
Profesori përmend si shembull takimin midis Kim Jong Il, i cili do të pasonte Kim Il Sung, dhe Xi Jong-sun, babait të Xi Jinping, në vitin 1983 në Pekin. “Rasti i Ju-E është pjesë e këtij trendi”, shton ai.
Shërbimi Kombëtar i Inteligjencës (NIS) i Koresë së Jugut pranoi për herë të parë në vitin 2024 se Ju E mund të jetë trashëgimtarja e regjimit. “Sipas një analize të paraqitjeve publike të Kim Ju E dhe nivelit që i është dhënë asaj në protokoll, duket se ajo është aktualisht pasardhësja më e mundshme”, - tha Cho Tae-yong, kreu i atëhershëm i agjencisë.
Cheong Seong-chang i Institutit Sejong në Seul, tregon se “gjatë një parade ushtarake, kali i bardhë i Ju E u shfaq në vendin e dytë pas atij të Kim Jong Un”.
“Është provë” se ajo do ta pasojë atë, sipas tij, ashtu si edhe fakti që Pheniani “nxori pulla që përshkruajnë babanë dhe vajzën”.
Fëmija i preferuar i Kim Jong-un
Pak dihet për vajzën e dashur të Kim Jong-un, e cila pritet të bëhet udhëheqësja e ardhshme e Koresë së Veriut.
Ju-E u pa për herë të parë në publik në vitin 2022, duke shoqëruar të atin në një lëshim rakete. Megjithatë, ishte ish-ylli i NBA-së dhe miku i udhëheqësit të Koresë së Veriut, Dennis Rodman, i cili zbuloi se Kim Jong-un kishte një vajzë.
Kim thuhet se ia prezantoi gruan dhe fëmijën e tij, duke i thënë "kjo është vajza ime", gjatë vizitës së Rodman në Phenian në vitin 2013.
Mediat e Koresë së Veriut nuk e kishin zbuluar kurrë emrin e saj, por e kishin përshkruar atë si "fëmijë të dashur" dhe "të nderuar".
Agjencitë e inteligjencës së Koresë së Jugut thonë se Ju-E është vajza e Kim Jong Un dhe gruas së tij, ish-yllit të popit dhe zonjës së parë Ri Sol Ju, me të cilën ai u martua në vitin 2009.
Në paraqitjet e fundit, ajo është parë duke ecur përkrah babait të saj dhe përpara tezes së saj, Kim Yo Jong, dhe nënës së saj.
Ju-E ka qenë në lajme për stilin e saj, pasi njihet për zgjedhjen e syzeve të diellit të shtrenjta, orëve Cartier dhe xhaketave prej lëkure pavarësisht se është shumë e re. ©LAPSI.al
